Suriyada keçid hökuməti artıq elan olunub. Keçid hökuməti martda qəbul olunan 5 illik keçid dövrü konstitusiyasına əsasən fəaliyyət göstərəcək.
Suriya prezidenti Əhməd əş-Şara bildirib ki, yeni hökumət fərqli etnik, dini və ya hərbi-siyasi qrupların təmsilçiliyinə əsaslanmayıb. Yəni hansısa qrupun təmsilçisi hökumətdə yer almır. Lakin eyni zamanda ərəb mediası yeni hökumətdə yer alan etnik və dini qrup təmsilçilərinin olduğunu qeyd edir.
İlk növbədə onu qeyd edək ki, Suriyanın keçid hökumətinin başçısı baş nazir deyil, prezident olacaq. Yəni baş nazir postu ləğv olunub və hökumətə prezident rəhbərlik edəcək. Bu, Suriyada yeni siyasi sistemin olduğunu göstərir. Eyni zamanda prezidentin özünə bir neçə müavin təyin etmək səlahiyyəti var.
Bundan əvvəlki müvəqqəti keçid hökumətində yer alan xarici işlər naziri Əsəd əş-Şeybani və müdafiə naziri Murhaf Əbu Kəsra postlarını qoruyub saxlayıb. Qeyd edək ki, Suriyanın xarici işlər, müdafiə, ədliyyə və daxili işlər nazirləri Əhməd əş-Şara kimi HTŞ üzvləridir. Keçmiş hökumətdəki daxili işlər naziri Əli Kada hökumətin baş katibi təyin olunub, kəşfiyyat rəisi Ənəs Xəttab isə daxili işlər naziri olub.
22 nəfərdən ibarət hökumət kabinetində SDQ üzvü olmasa da, təhsil naziri Afrin rayonundan olan bir kürd, kənd təsərrüfatı naziri druz, nəqliyyat naziri Yarub Bədir isə daha əvvəl Bəşər Əsəd hökumətində nazir postunu tutmuş nusayri, yəni ələvidir. Bundan başqa, sosial işlər və əmək naziri Dəməşqdən olan xristian qadın təyin olunub. Müvəqqəti keçid hökumətinin baş naziri Məhəmməd əl-Bəşir isə yeni yaradılan Enerji naziri postuna təyin olunub.
Göründüyü kimi, Əhməd əş-Şara bundan əvvəlki hökumətlə bağlı tənqidləri nəzərə alaraq Suriyanın etnik və dini mozaikasını nəzərə almağa çalışıb. Lakin iki mühüm detal var.
Birincisi, yuxarıda da qeyd olunduğu kimi, Suriya hökumətinə “kənardan”, yəni heç bir siyasi və ya hərbi qrupdan nümayəndə daxil etməyib.
İkincisi, həssas və həlledici nazirliklər HTŞ-də qalıb. Bu isə o deməkdir ki, Şara qarşıdakı 5 illik keçid dövründə hakimiyyətini möhkəmləndirəcək.
Nəhayət, bu dəfə də türkmən etnosundan heç kimə hökumətdə vəzifə verilmədi. Bu isə türkmən qruplarda narazılıqla qarşılanıb.
