İsrail ordusunun martın 18-də Qəzzada həyata keçirdiyi bombardmanlar nəticəsində ən azı 330 fələstinli ölüb. Bu, yanvarın 19-da əldə olunmuş atəşkəs razılaşmasından sonra baş vermiş ən şiddətli bombardman hesab olunur.

Ölənlər arasında Qəzzə zolağında hökumətin monitorinq və nəzarət komitəsinin rəhbəri doktor İssam Əl-Dalis, HƏMAS-ın tanınmış rəsmisi və Qəzzə zolağında daxili əməliyyatların rəhbəri Bəhcət Əbu Sultan, Qəzzədə Daxili İşlər Nazirliyinin əməliyyat rəhbəri Əbu Ömər kimi tanınan Əhməd Ömər Əl-Hati, Qəzzədə HƏMAS hökumətinin Ədliyyə Nazirliyinin baş direktoru general Mahmud Əbi Vətfa, Qəzzədə HƏMAS hökumətinin Daxili İşlər Nazirliyində baş direktor və Qəzzə zolağının cənubundakı inzibati təşkilatın rəhbəri Əbu Ubeyda Əl-Cəmasi də var.

Bombardman zamanı çoxlu sayda qadın, uşaq və qoca da ölüb.

Əsas zərbələr Qəzza, Rəfah və Xan Yunis şəhərlərinə endirilib. Bununla da faktiki olaraq İsrail 19 mart atəşkəsindən çıxmış olub.

Qeyd edək ki, 19 yanvarda qüvvəyə minmiş 3 mərhələli atəşkəs razılaşmasına əsasən, 6 həftə davam edəcək və martın 1-də bitəcək 1-ci mərhələdə israilli 33 girov azad ediləcək, həmçinin İsrail ordusunun geri çəkiləcək və Qəzza zolağına humanitar yardımın buraxılmalı idi.

Birinci mərhələ ərzində həmçinin 2-ci mərhələnin bəndləri razılaşdırılmalı, martın 1-dən etibarən İsrail ordusu Misir-Qəzza sərhədində yerləşən “Filadelfiya dəhlizindən” geri çəkilməli, hərbi əməliyyat dayanmalı, qalan bütün israilli girovlar və fələstinli məhkumlar azad edilməli idi.

Lakin martın 1-də məlum oldu ki, atəşkəsin 2-ci mərhələsi hələ razılaşdırılmayıb, İsrail hakimiyyəti 1-ci mərhələnin uzadılması və bütün girovların azad edilməsini tələb edir. Həmas isə bu təklifdən imtina etdi. ABŞ isə girov dəyişikliyi də daxil olmaqla 1-ci mərhələnin aprelin ortalarına qədər davam etməsini təklif etdi. Lakin Həmas bu təklifi qəbul etmədi.

İsrail Qəzza bombardmanını Həmasa qarşı güclü bir cavab adlandırıb. Həmas isə İsraili atəşkəs razılaşmasını pozmaqda və Qəzzadakı girovları “qeyri-müəyyən vəziyyətə sürükləməkdə” ittiham edib. Lakin bununla belə Həmas yalnız BMT-yə şikayət etməklə kifayətlənərək İsrailə müharibə elan etməyib. İsrail ordusu bombardmanlarla birlikdə Qəzza əhalisinin zolağın şərqinə doğru yönəlməsini tələb edib.

Netanyahunun Qəzzaya yenidən hücum əmri verməsi daha əvvəl də qeyd olunduğu kimi, atəşkəs sazişindən çıxmaq cəhdidir. Netanyahu hökuməti Həmasın hazırkı zəif vəziyyətindən maksimum istifadə etməklə, Qəzza zolağını tamamilə nəzarətə götürmək və müharibənin əvvəlində elan etdiyi kimi, Qəzzanı Həmas və İslami Cihad kimi silahlı qruplardan təmizləmək planını başa çatdırmaq istəyir. Trampdan da dəstək alan Netanyahu hədəfinə çatmağa yaxın olduğunu düşündüyü üçün daha da qəddar qərarlar verir.