Həmas hərəkatı Qəzzada 60 günlük atəşkəs təklifini qəbul edib. Plana əsasən 60 günlük atəşkəs çərçivəsində Həmas 20-yə yaxın girov azad edəcək, bunun qarşılığında isə İsrail həbsdə olan fələstinliləri azad etməlidir. Təklif Qətər və Misir heyətləri ilə Qahirədə keçirilən görüşdə əldə olunub.

Hazırda Həmasın əlində 50-yə qədər girovun olduğu və bunların 20-yə yaxınının sağ olduğu ehtimal olunur. Həmçinin Həmasın təklifində yanvarda əldə olunmuş razılaşmaya əsasən İsrail ordusunun Qəzza zolağının bəzi bölgələrindən çıxarılmalıdır.  

Son məlumata görə, Qəzzada ölənlərin sayı 62 minə çatıb. 2023-cü ilin oktyabrından başlayan hərbi əməliyyatlar zamanı 156 min Qəzza sakini yaralanıb və ya şikəst olub. 

Son 1 sutka ərzində isə Qəzzada daha 3 yerli sakin aclıqdan ölüb. Bununla da zolaqda acından ölənlərin sayı 266 nəfərə çatıb. Ölənlərdən 112-si uşaqdır.

Misir hökuməti bəyan edib ki, İsrail Qəzza ilə sərhəddə gözləyən 5 min yük maşınında olan ərzaq yardımının zolağa buraxmır. 

Belə demək olarsa, ABŞ və İsrail Qəzzada aclıq embarqosu ilə Həmasa təzyiq göstərə bildi. Lakin İsrail rəhbərliyinin bu razılaşmaya sadiqliyi şübhəlidir. ABŞ prezidenti hərbi əməliyyatlara razılıq verməklə Həmasa təzyiq göstərdiyi kimi, eyni şəkildə İsrail baş nazirinə də daxili etirazlarla təzyiq etməyə çalışır. Lakin Netanyahunun Həmas qədər zəif vəziyyətdə olub təzyiqə nə qədər boyun əyəcəyi sual doğurur. Son həftələrdə Azərbaycan və Ermənistan, indi isə Rusiya və Ukrayna arasında sülh prosesində arbitr rolunu oynamağa çalışan Trampın Qəzzada atəşkəsə nail olmaqla həm də seçkiqabağı vədlərini reallaşdırmaq ümidi var. Lakin İsrail baş nazirinin Qəzzanı tamamilə işğal etmək və Həması zolaqdan çıxarmaq planından imtina edəcəyi inandırıcı görünmür. Bu məsələdə Netanyahuya təzyiq daha çox daxildəndir. İsrail ictimai rəyi baş nazirin müharibəni davam etdirmək üçün girovları qurban vermək və ordunu yenidən yorucu müharibəyə vadar etməsindən narazıdır.  

Bu səbəbdən də indi Netanyahunun qarşısında yeganə yol, qısa müddətli atəşkəsə getmək və bununla da daxildəki və xaricdəki təzyiqləri neytrallaşdırmaqdır. Ancaq bu atəşkəs qısa müddətli olacaq və ən yaxın fürsətdə Netanyahu Qəzzada yenidən əməliyyatları bərpa etməyə çalışacaq.