Suriya xarici işlər naziri Əsəd Şeybani dünən Moskvaya səfər edərək xarici işlər naziri Sergey Lavrov və prezident Putinlə görüşüb. 

Ancaq Şeybani Moskvaya tək getməyib, müdafiə naziri Murhaf əbu Qəsra və kəşfiyyat rəisi Hüseyn Salim də onu müşayiət edib. Moskvad ahəm də iki ölkə müdafiə nazirləri arasında görüş keçirilib.

Ərəb mediasının məlumatına görə, Şeybani Moskvada Suriya keçid hökuməti Rusiya ilə dostluq və “qarşılıqlı ehtiram” istəyib.

Qeyd edək ki, Şeybaninin Moskvaya səfəri Bəşər Əsədin devrildiyi dekabrdan bu yana ilk yüksək səviyyəli təmas hesab olunur.

Şeybaninin Rusiya ilə dostluq çağırışına cavab olaraq Lavrov Moskvanın hər cür dəstəyi verməyə hazır olduğunu deyib. 

Dəməşqin Moskvaya üz tutmasının arxasında ciddi səbəblər var. Məsələn, bu ilin əvvəlində Moskvadan Bəşər Əsədi tələb edən, hətta bir ara Xemymimdəki bazanı mühasirəyə alan Dəməşqin indi davranışı dəyişib. 

Qeyd edək ki, Suriyada hələ də Rusiyanın iki hərbi bazası – Tartusda dəniz bazası, Xemymimdə (Laziqiyyə) isə hərbi-hava bazası hələ də fəaliyyət göstərir. Moskva üçün bu bazaların yerində qalması lazımdır. 

Ancaq Suriyanın yeni hakimiyyəti Moskvadan bir sıra istəkləri var. İlk növbədə daxili təhlükəsizlik. 

Rusiyanın Suriyada həm kürdlər, həm də həssas cənub ərazilərdə ciddi təsiri var və üstəlik keçmiş rejim qalıqları da Moskvaya bağlıdır. Bu səbəbdən də hər nə qədər Vaşinqtonun müttəfiqi olsa da, Dəməşqə həm də Moskva ilə barışıq lazımdır. 

Qarşılıqlı anlaşma. Dəməşq hökuməti Tartus və Xmeymim bazaları qarşılığında Moskvadan ucuz yanacaq, taxıl və silah almaq istəyir. Çünki indi sadalanan 3 məhsulu münasib qiymətə ala biləcəyi yeganə ölkə Rusiyadır. 

Məhz bu səbəbdən də Suriya rəsmiləri bu dəfə Bəşər Əsədin adını çəkmədi, ya da bazaların taleyini açıq bazarlıq vasitəsi olaraq Moskvanın qarşısına qoyub tələb dili ilə danışa bilmir. Çünki indi Dəməşqin sabitlik və bərpaya ehtiyacı var, bunun üçün Rusiya ilə barışığa məhkumdur.

Yeri gəlmişkən, Moskva görüşlərində Əsəd Şeybaninin yanında əyləşmiş Mahir əl-Şara Suriyanın hazırkı prezidentinin qardaşı və hökumətin baş katibidir. Mahir əş-Şara uzun illər Rusiyada yaşayıb və həyat yoldaşı Rusiya vətəndaşıdır.