İsrail aviasiyası Suriyada bir neçə hərbi hədəfi bombalayıb. Rəsmi açıqlamaya əsasən hava zərbələri Suriyanın hərbi qabiliyyətini hədəf alıb.
Bura Dəməşqin Masaken-Barzeh rayonunda yerləşən hərbi tədqiqat mərkəzi, Hama vilayətində hərbi-hava bazası daxildir. Hərbi-hava bazasının uçuş meydançası tamamilə sıradan çıxarılıb. Aviabazada 4 nəfər, ümumilikdə isə hava zərbələri nəticəsində 8 mülki insan ölüb.
Qeyd edək ki, İsrail son bir ay ərzində 3-cü dəfə Suriyanın mərkəzində Hama vilayətində Tədmur (Palmira) şəhəri yaxınlığında yerləşən T-4 olaraq tanınan hərbi-hava bazasını bombalayır.
Qeyd edək ki, dünən Türkiyə və Suriya mediası Türkiyə ordusuna məxsus avtomobillərin Suriyanın mərkəzinə doğru hərəkət etdiyini, T-4 və ya başqa adı ilə “Tiyas” hərbi bazasının Türkiyə ordusuna verilməsi barədə xəbərlər yaydı. Xəbərlərdə iddia olunurdu ki, Türkiyə ordusu T-4-də hava hücumundan müdafiə sistemləri quraşdıracaq.
Belə görünür ki, İsrail Türkiyə ordu qüvvələri T-4-ə daxil olmamışdan bazanı yararsız hala gətirməyə çalışıb. İsrail hakimiyyəti bundan əvvəl də elan edib ki, Türkiyənin Suriyada hərbi baza yaratmasını özünün təhlükəsizliyi üçün “potensial təhdid” olaraq görür.
Bir çox müstəqil ekspertlər isə Türkiyənin Suriyada hərbi baza qurmasını İsrail və Türkiyə arasında hərbi qarşıdurma riski yaradacağını ehtimal edir. Söhbət ondan gedir ki, Türkiyə və İsrail bir-biri ilə müharibəyə girmək istəmir və birbaşa qarşıdurma ehtimalı çox azdır. Lakin Türkiyənin Suriyanın mərkəzində və cənubunda hərbi baza qurması və xüsusən də hava hücumundan müdafiə sistemləri yerləşdirməsi İsraili narahat edir. Çünki İsrail hələ Bəşər Əsəd dövründə belə istədiyi zaman Suriya ərazisinə daxil olaraq hərbi obyektləri bombalayırdı. Ancaq Türkiyənin Suriyada hava qüvvələri və hava hücumundan müdafiə sistemləri yerləşdirməsi İsrailin Suriyada sərbəst hərəkətini məhdudlaşdıracaq və İsrail aviasiyası üçün təhlükə yaradacaq. Digər tərəfdən, Suriya ordusunun Türkiyə Müdafiə Nazirliyi tərəfindən təşkil olunacağı ilə bağlı Dəməşq-Ankara razılaşması da İsraili ciddi narahat edir. Netanyahu hökuməti anlayır ki, qarşıdakı dövrdə İsrailin Suriya üzərində təzyiq və təhdid siyasəti işə yaramaya bilər və Ankaranın Suriyada təsir rıçaqlarını ələ keçirməsi ilə İsrail üzərində təzyiq imkanları yarana bilər. Bu isə İsrail üçün ciddi başağrısı ola bilər.
