Şimali İraq kürd administrasiyasında bazar günü keçirilən seçkilərin
nəticəsi açıqlanıb. Rəsmi rəqəmlərə görə seçkilərdə muxtariyyət sakinlərinin 72
faizi, yəni 2082000 nəfər iştirak edib. kürd muxtariyyətinin yeni seçki
qaydalarına əsasən 100 yerlik parlamentdə 95 yer ümumi səsvermə ilə müəyyən
olunur, 5 yer isə türkmən, erməni və xristian (süryani) vətəndaşlar arasında
bölünür.
12 partiya və 2 seçki koalisiyasının qatıldığı seçkilərin nəticələrinə
əsasən Bərzani ailəsinin nəzarətində olan Kürdüstan Demokrat Partiyası birinci
olub. Belə ki, KDP 809 min, onun əsas rəqibi, Talabani ailəsinin nəzarətində
olan Kürdüstan Vətənpərvərlər İttifaqı (KVİ) Partiyası isə 408 səslə ikinci
olub. Yeni Nəsil Hərəkatı isə 291 min səslə üçüncü yerdə qərarlaşıb.
Mandat bölgüsünə əsasən KDP 39, KVİ 23, Yeni Nəsil isə 15 mandat
alıb. Digər yerlər isə Kürdüstan İslami Birlik Partiyası (Yekgirtu) 7, Kürdüstan
Ədalət Cəmiyyəti Partiyası (Komel) 3, Halvest (Duruş) Hərəkatı 4, Xalq Cəbhəsi
2, Qoran və Kürdüstan İttifaqı Qrupu isə hərəyə 1 mandat alıb.
İlkin nəticələrə əsasən seçkilər türkmənlər üçün uğurlu olmayıb. Belə
ki, İraq Türkmən Cəbhəsi və müstəqil türkmən namizədlər seçkilərdə qalib gələ
bilməyib.
Bizimlə söhbət zamanı Türkməneli Tələbə və Gənclər Birliyinin Telafer
təşkilatının sədri Ziyad Əli Emin oğlu bildirdi ki. seçkilər türkmənlər üçün
uğurlu olmayıb. Həmsöhbətimiz bunu türkmənlərin seçkilərdə fəal iştirak etməməsi
ilə izah edir. Sitat: “Bildiyiniz kimi, Şimali İraqdakı seçkilər İraqın digər
regionlarından fərqli şəkildə keçirilir. Seçkilərin nəticələrindən razı
qaldığımızı deyə bilmərəm. Bizim Ərbil və Süleymaniyə bölgəsinə bağlı Kifri
rayonunda namizədlərimiz var idi. Koifridəki namizədimiz müstəqil qatılmışdı,
Ərbildə isə “Canım Ərbil” blokunda vahid siyahı ilə seçkilərə qatılmışdıq. 12
namizədimiz var idi. Ancaq namizədlərimizin heç biri qazanmadı. Türkmənlərin
yalnız az bir qismi seçkilərə qatıldı. Çünki kürd bölgələrində türkmənlərin çox
ciddi problemləri var. İraq Türkmən Cəbhəsi türkmənlərin seçkilərdə daha fəal
iştirakı üçün bir çox işlər görsə də, nəticə uğurlu olmadı”.
Həmsöhbətimiz deyir ki, hazırda İraqda çox ciddi iqtisadi problemlər olmasa
da, Şimali İraqda vəziyyət bir qədər fərqlidir, əhalinin sosial-iqtisadi sıxıntıları
var: “Hökumət burada işçilərin maaşlarını vaxtında ödəyə bilmir”.
Ziyad Əli Emin oğlunun sözlərinə görə, İraqda, xüsusən də Şimali
İraqda türkmənlər yaxşı təşkilatlanıb, çoxlu sayda dərnək və cəmiyyət yaradıb.
Geniş fəaliyyət sahəsinə malikdirlər. müəyyən qədər Telaferdə əhalinin problemləri
var: “Türkmənlərin İraqda çoxlu sayda dərnək və birlikləri var. Bizim İraq
Türkmən Cəbhəsinin Kərkük, Ərbil, Mosul, Telafer, Kifri və digər rayonlarda
qollarımız, dərnəklərimiz var. Şükür Allaha, fəaliyyətlərimiz də gözəl şəkildə
davam edir. Türkmən bölgələrində, xüsusən də Kərkük və Telaferdə fəaliyyətlərimiz
çox yaxşıdır. İqtisadi vəziyyət də çox pis deyil, yalnız Telaferdə bəzi
sıxıntılar var. Telafer böyük bir qəzadır, əhalisi çoxdur, burada işsizlik
problemi var, insanlar iş tapa bilmirlər”.
Qeyd edək ki, hazırda daha bir narahatlıq doğuran vəziyyət Kərkükdədir.
Belə ki, Kərkük valisi vəzifəsinə mərkəzi hökumət tərəfindən kürd əsilli şəxsin
təyin olunması türkmən ictimaiyyətində narazılıqla qarşılanıb. Bundan başqa,
İTC-nin təmsilçisi Yavuz Hamid Mahmudun təşkilatın razılığı olmadan Kərkük
valisinin müavini vəzifəsinə təyin olunması İTC-də narazılıqla qarşılanıb və
oktyabrın 19-da İTC Hamid Mahmudu təşkilat sıralarından xaric edib: “İraq mərkəzi
hökumətinin Kərkükə vali təyin etməsi və bundan sonra Yavuz Hamid Mahmudun
İTC-nin razılığı olmadan təşkilat adından vali müavini vəzifəsinə seçilməsi
türkmən təşkilatları tərəfindən narazılıqla qarşılanıb. Kərkük mövzusunda hələ
də sıxıntılarımız davam edir”.
