İsrail ordusu bir neçə həftə
ərzində (güman ki, Ramazan bitdikdə) Rəfah şəhərinə hücum edəcək. Bu barədə
açıqlama verən baş nazir Netanyahu deyib ki, “heç bir beynəlxalq təzyiq
İsrailin müharibədəki məqsədlərinə çatmasına mane ola bilməz”.
Onun sözlərinə görə, Qəzzada
müharibənin indi, yəni məqsədinə nail olmadan dayandırması İsrailin uduzması mənasına
gəlir və hökumət buna imkan verməyəcək. Netanyahu deyib ki, Qəzzada əməliyyat
“Həmasın məhv edilməsi, bütün girovların azad edilməsi və Qəzzanın yenidən İsrailə
qarşı heç bir təhdid təşkil etmədiyi” bir vəziyyətə gələnə qədər davam edəcək.
Qeyd edək ki, ötən cümə
günü “Jerusalem Post” qəzeti baş nazir Netanyahunun Rəfah şəhərində “mülki əhalinin
təxliyəsini” də nəzərdə tutan hərbi əməliyyat planını təsdiqlədiyi haqda xəbər
yayıb.
Qonşu ərəb ölkələrinin,
ABŞ və Avropa İttifaqının, eləcə də BMT və digər beynəlxalq təşkilatların qəti
xəbərdarlığı, hətta sərt addımlar atılması ilə təhdid etməsinə rəğmən İsrail
hakimiyyəti Rəfah əməliyyatından geri çəkilmək fikrində deyil. Bunun isə bir
neçə səbəbi var.
1. İsrail güman ki, kəşfiyyat məlumatı ilə Həmasın əsas liderləri
və komandirlərinin Rəfahda gizləndiyini bilir. Buna görə də Həması tamamən yox
etmək üçün Rəfaha hücum etməkdə israr edir.
2. Rəfaha hücum coğrafi olaraq Qəzzanın Misirlə sərhədinin nəzarətə
götürülməsi və belə demək olar ki, zolağın tamamən İsrailin nəzarəti altına
düşməsi deməkdir.
3. Rəfah əməliyyatı olmadan, yəni Qəzza tamamilə ələ keçirilmədən
müharibənin dayanmasını İsrail hakimiyyəti psixoloji olaraq zəiflik kimi görünməsindən
ehtiyat edir. Bunu Netanyahu açıq şəkildə bildirir ki, Rəfah əməliyyatı olmadan
müharibə dayansa bu, İsrailin uduzması kimi görünə bilər.
4. Nəhayət, daxili amillər. Netanyahu anlayır ki, əgər indiki şərtlərdə
müharibəni dayandırsa və danışıqlara getsə o zaman İsrail sağı ondan üz döndərəcək
və o baş nazir postunu itirəcək, bundan sonra isə güman ki, mühakimə olunacaq və
üstəlik özü ilə yanaşı partiyasının siyasi karyerası bitəcək. Bu səbəbdən də
indi yalnız Netanyahu özü deyil, həm də koalisiya üzvləri müharibəni
dayandırmaq istəmir.
