Qəzzada Ramazan ayında atəşkəsin əldə olunması ilə bağlı cəhdlər
uğurla nəticələnmədi. Fələstində Ramazan ayının ilk günü qanlı keçib, gecə boyu
baş verən bombardmanlarda onlarla insan ölüb.
Halbuki ötən həftə, həm ABŞ prezidenti Cozef Bayden, həm də İsrail və
eləcə də Həmas rəsmiləri atəşkəs danışıqlarında müsbət irəliləyişin olduğunu bildirmişdilər.
Ərəb mediası bildirirdi ki, əsas problem Qəzzanın şimal hissəsindən qovulmuş
əhalinin yenidən evlərinə geri dönməsi və müvəqqəti atəşkəs mərhələsi bitdikdən
dərhal sonra əhatəli və yekun atəşkəs və sülh prosesinin başlaması ilə
bağlıdır. Həmas bu iki məsələdə israr etsə də, İsrail öz tələblərini irəli
sürür.
Həmasın bu tələbi müəyyən mənada ABŞ və Misirin, eləcə də Qətərin
sülh müzakirələri təşəbbüsü ilə üst-üstə düşsə də, İsrail tərəddüd edir. Çünki
Netanyahu hökuməti Qəzzanın gələcək taleyini İsrailin müəyyən etməsini, Həmasın
Qəzzanın idarəçiliyindən uzaqlaşdırılaraq zolağın silahsızlaşdırılmasını istəyir.
Görünür ki, atəşkəs danışıqlarının birinci mərhələsi, yəni döyüşlərin
ən azı Ramazanda dayandırlması ilə bağlı hər iki tərəf ortaq mövqedə olsa da, son
nəticədə atəşkəs əldə olunması mümkün olmadı. Bu gün ABŞ prezidenti yerli
mediaya müsahibəsində atəşkəs danışıqlarının baş tutmamasına görə dolayısı ilə
baş nazir Netanyahunu ittiham edib. Prezident Bayden deyib ki, Netanyahu artıq
İsrailə faydadan çox zərər verir. Belə görünür ki, Bayden və ABŞ
administrasiyası Fələstində baş verənlər görə Netanyahu ilə dil tapa bilmir və
bu səbəbdən də artıq bu narazılığı açıq dilə gətirir. Əlbəttə, Baydenin
Netanyahudan narazılığı əvvəl də var idi. Lakin sülh cəhdlərinin nəticə verməməsi
amerikalıları getdikcə daha çox qəzəbləndirir. Çünki Netanyahu və onun radikal
sağçı hökumətinin Qəzzada apardığı amansız müharibə təkcə Qəzza üçün faciə
deyil, həm də ABŞ-ın regional siyasətinə zərbə vurur, Fələstinlə bağlı sülh
ümidlərini tükəndirir, Vaşinqtonun 50 ildir apardığı yumşaq güc siyasətini
laxladır, etibardan salır. Belə görünür ki, amerikalılar Yaxın Şərqdə etimadı
yenidən qazanmaq üçün həm də İsrailin radikal sağçıları ilə hesablaşmalı olacaqlar.
Hələliksə Qəzzada Ramazan ayı başlamasına rəğmən döyüşlər,
bombardmanlar davam edir.
